Хиёнат кўзгуси

Эртакларда сехрли кўзгу бор, Оппоғойнинг энг чиройли эканлигини айтиб турадиган. Ушбу блогпост эса “Қоравой”нинг сехрли кўзгуси ҳақида. Аммо айтажагим – эртак эмас.

Тошали ва Қулпинса (Қулпинисо) ҳовлида ўра қазиётиб қути топиб олишди. Ичида нима борлигини билиш иштиёқи ва бошқа бизга номаьлум ҳаёллар билан уни уй ичига олиб киришди-да очишди. Бир қоғоз ва бир кўзгу чиқди. Қоғозда кўзгунинг сеҳрли эканлиги - унга ким қараса, ёстиқдошига ўтмишда қилган хиёнатлари кўрсатилиши ёзилган эди. Буни ўқиб эр-хотин бир-бирига бироз қараб тургач, Қулпинсанинг таклифи билан топилма парда ортидаги уй меҳробида, қават-қават қилиб тахланган кўрпалар остидаги сандиқнинг энг тагига жойланди.

Мана шу жойда сизда бир савол туғилиши мумкин: - “Нега энди улар топилмани дарҳол синаб кўрмадилар?”

Улар бежизга бир-бирларига бироз тикилиб туришмади. Ўтмишларини ернинг қуёш атрофида айланиш тезлигидан бир неча марта юқори тезликда, тескари айлантириб кўрсатилган кинотасмадай,  ҳаёлдан бир ўтказиш учун мана шу “бироз” етарли эди. Сизга бу садоқатли жуфтликни яқинроқ таништириб олай - саволнинг жавобини ўзингиз топиб оласиз.

Тошали:  - “Кўчаларни кезиб ташлаган”, Тошйўлининг ҳамма бўйига етган қизларини танийдиган, баъзиларининг қаерида ҳоли борлигигача биладиган йигит.Уйлангунича ғирт бекорчи; уйланганидан кейин, яъни икки йилнинг бу ёғида, қайнотаси олиб берган машинада киракаш. Тўйдан олдин “дадажон”ига: “Ғирт “ўшаман”, агар қизингизга хиёнат қилсам!” – деган эди. Ваъдасида тураётган ёки йўқлиги бизга қоронғу. Аммо шуниси аниқки, “капалак”лар билан тушилган суратлар тўйдан бир неча кун аввал ёқиб юборилган ва телефон рақами ўзгартирилган. Айни пайтда Қулпинсани синамоқчию, аммо кейин вафодор эрининг ҳам кўзгуга бир қарашини илтимос қилиб қолишидан қўрқади.

Қулпинса: - Тахтакўприклик ғирт танноз. Дугонасининг туғилган кун оқшомига деб кетганидан бироз вақт ўтгач, шу куни “туғилажак” дугонаси уни қидириб уйига келган вақтлари ҳам кўп бўлган. Хуллас, “қўлқопдай алмаштирадиган”лардан эди. Аммо шуниси аниқки, “ит талаган” ёки “ит еб тугатган” либосларда тушилган фотосуратлар тўйдан олдин йўқ қилинган ва телефон рақами ўзгартирилган. Тўйдан кейин ҳеч қаерда ишламаганлиги боис уйда ўтиради. Фақатгина ора-чурада дугонасиникига бориб туради. Айни пайтда Тошалини синаб кўришга майли бор, аммо кейин у ҳам “топ-тоза” хотинининг ўтмиши билан қизиқиб қолишидан қўрқади.

            Ҳозир ўхшатиб учратилган “қаҳрамон”ларимизнинг кўнгиллари хотиржам, чунки қути сандиқнинг ичида. Буни Қулпинса таклиф қилди. Тошали хотинининг ўз ёрига ишонишини, содиқлигига шубҳа ҳам қилмаслигини кўриб; унга муҳуббати янада ортди. Қулпинсанинг кўнгил айвонида ҳам шунга ўхшаш ҳаёллар ва ўйлар шамоли кезинган бўлса керак.

            Одатий кунларнинг бирида, Тошали машинасидан бир йўловчининг унутиб ёки атайлаб қолдирган суратини топиб олгунигача улар кўзгу ҳақида ўйламаётган ҳам эдилар. Шопмўйловли бир йигитнинг орқасида унинг бўйнига қўлларини ўтказиб тушган Қулпинсанинг сурати эди бу. Тошалининг юраги қум зарраларидай парчаланди. Вафоли аёли ҳақидаги тасаввури ўзгарди. Хотинини шунчалик ёмон кўриб кетдики, қайнотаси олиб берган машинага кўшиб портлатиб юборгиси келди. Ўзбек эркакларига хос бўлган фазилат - аёлининг хиёнатини кўтара олмайдилар. Ўзларининг хиёнатлари, нари борса, шунчаки ёшлик хатолари сифатида қаралади.

            Мана энди уй ичида кўрпалар остин-устун ирғитиб ташланган. Меҳробдаги сандиқнинг оғзидай катта очилиб - ёпилаётган Тошалининг оғзидан боди кириб, шоди чиқаётир. У шубҳаларига кўзгу орқали ойдинлик киритмоқчи бўлиб турган бир пайтда, Қулпинса ҳушини йўқотиб, кўрпалар устига йиқилди. Аёл эрининг кутилмаганда бошлаган пўписасидан қўрқдими ёки анча йиллар олдин дадасини алдашда ишлатадиган қуроли - актёрлик маҳоратини ишга солаяптими?! Нима бўлган тақдирда ҳам, бир қулида хотинининг бошини кўтариб, иккинчи қўлида унга сув тутаётган Тошалининг овоз пардалари энди хиёнат ҳақидаги қўшиқларнинг авжини эслатмасди. Сувдан ўзига келган ёр эса пичирлай бошлади: “Наҳотки менга ишонмадингиз, мени шунчаликка боради деб ўйлаганмидингиз, Сиздан кутмагандим, Кимдир Сизга мени ёмон қилиб кўрсатмоқчи бўлса ишониб кетаверасизми? Сизга хиёнат қилишим мумкинми, айтинг?! Бунака туҳматдан кўра мени ўлдириб қўя қолинг!”

        Қулпинсанинг гаплари шунчалик табиий эдики, Тошали чиндан ёрига нисбатан: “ошириб” юбораётганини ҳис қилди. Айниқса унинг:  “Сизга хиёнат қилишим мумкинми айтинг?” – деган саволи Тошалининг тош юрагини тешиб ўтди. 

      Тошали енгилди: - “Ахир хотиним мени хиёнатга номуносиб, вафоли, аёлига ишонадиган, унинг кўнглига озор етказмайдиган эр деб билса, менинг бу томошам ўринлими?! Мен хато иш қилиб қўйдим, бордию кўзгуда у ҳам мени кўришни талаб қилиб қолса, ҳамма қилмишларим ошкор бўладику! Ҳўш, шундан кейин ҳам менга яна ҳозиргидай ишонадими, менга фақат яхшиликни раво кўрадими?!”

Тошали миясига санчилган оғриқли шу ўй билан кўзгуни синдириб юборди-да хотинидан узр суради. Ҳаммаси яхшилик билан тугади деб ўйлади. Лекин мана бир неча йилдирки, тунлари истиробга бурканиб ётади – агар ўшанда кўзгуни синдириб юбормаганида нима бўлиши мумкин эди?!

Айтганларим – эртак эмас!

Ҳикоя сизга эртакка ўхшаб туюлиши, “Ээ, ҳаётда бунақаси бўлмайди”- дейишингиз мумкин. Тасаввур қилинг, фан-техника тараққиёти туфайли шунақа ихтиро яратилди, одамнинг ўтмишда исталган кун, вақтдаги қилган ишларини кўрсатиб бера оладиган. Ҳеч бўлмаса, бунақа ихтиро 50 йилдан кейин яратилиши мумкинлигига ишонарсиз?! Шунда  набираларимиз ҳаётимизни томошо қилиб ўтирибдилар. Сиз ҳақингизда нималарни тамошо қилишларини ўйлаяпсизми? Ҳаҳаҳа...! 

 Нега бу ҳикояни ёздим?

 Замонамизни шундай аҳволга келтирганмизки, йигитлар учун зино қилиш (айниқса, уйлангунга қадар) бўлиб турадиган ҳол сифатида қаралаётир. Йигитлар орасида бунака иш билан шуғулланиб кўрмаганларни “эплолмайдиганлар” деб ўйлашади. Фақат қизлар ўзларини никоҳгача бокира сақлашлари кераклиги ҳақида қайғурамиз. Йигитларга дарвозалар очиқми? Твиттерда бир йигит таҳминан шундай мазмнунда твит ёзган эди: “Умрида бирорта қизни қучмаган, бирор қизни ўпмаган битта “лох” ман бўлсам керак”. Мана ачинарли твит! Мана бугунги аҳвол! Эээ ҳуллас, уни-буни қўяйда айтаримни айтиб олай, мен ҳақимда бошқалар қандай фикрдалигининг менга аҳамияти йўқ. Мен бўлғуси турмуш ўртоғим, у билан бахтли кечиражак ҳаётимиз ҳақида ҳаёлларимда ўйлайвераман. Чимилдиқдаги ҳалолидан қўймасин, дейман.

Сиз нима дейсиз?!

P/S: Қаердадир сиз ҳам сеҳрли кўзгу топиб олсангиз бир қаранг-да синдириб ташланг! Айтгандай, “Қоравой”нинг кимлигини тушиндингиз.